REQA - Hêzên hikûmeta Şamê li Resafayê bi cih bûn

Hêzên Birêvebiriya Operasyonên Leşkerî ya Sûriyeyê / Wêne: AA

Hewlêr (Rûdaw) – Birêvebiriya Operasyonên Leşkerî ya Sûriyeyê li herêma Resafayê ya Reqayê bi cih bû.

Fermandarê Lîwa Şemal Dîmoqratî ya bi ser Hêzên Sûriyeya Demokratîk (HSD) ve Ebû Omer Idlibî ev agahî bi rêya hesabê xwe yê Xê belav kir.

Ebû Omer Idlibî diyar kir ku wan, Tehrîr El Şam û Koalîsyonê li Resafayê civînek kiriye.

Li gorî agahiyên ku wî dane, di civînê de behsa wê yekê hatiye kirin ku li Herêma Resafa valahiyeke ewlehiyê çêbûye û DAIŞ ji vê rewşê sûdê werdigire.

Di civînê de biryar hatiye dayîn ku hêzên Birêvebiriya Operasyonên Leşkerî ya Sûriyeyê li herêma Resafayê bi cih bibin.

Divê were gotin, Resafa di destê Hikûmeta Sûriyeyê de bû lê dema ku Tehrîr El Şam ber bi Şamê ve diçû ji bo ku DAIŞ wê derê kontrol neke HSD li wir bi cih bûbû.

Ebû Omer Idlibî diyar kir ku hinek çavkanî li ser vê mijarê nûçeyên derew belav dikin û rastiya mijarê bi vî rengî ye.

Resafe 30 kîlometreyî dûrî Reqayê ye û li ser Çemê Feratê ye.