TEHRAN - Xwendekarekê ‘li dijî hîcabê’ xwe tazî kir

RÛDAW

Hewlêr (Rûdaw) - Xwendekareka Zanîngeha Azad a Tehranê xwe tazî kir û li stastyona metroyê rûnişt.

Tê îdiakirin ku wê xwendekarê li hemberî binpêkirinên mafên mirovan û biryara hîcabê xwe tazî kiriye.

Vîdeoyên xwendekarê di torên medyaya civakî de gelekî belav bûn û heta niha navê wê jî nehatiye zanîn.

Medyaya nêzîkî mixalefeta Îranê îdia kir ku wê xwendekarê ji ber hîcab nedaye serê xwe rastî êriş û şkenceya hêzên Besîc û ewlehiya Îranê hatiye.

Her wiha piştî wê êrişê, xwendekarê hemû cilên xwe ji xwe kirine û li kampusa zanîngehê û li stasyona metroyê rûniştiye.

Birêvebiriya zanîngehê jî îdia kir ku ew xwendekar “nexweş e.”

Li gorî medyaya nêzîkî muxalefeta Îranê, piştî wê xwenîşandanê xwendekar ji aliyê hêzên ewlehiyê ve hatiye desteserkirin û ber bi cihekî nediyar ve hatiye birin.

Li gorî ajansa FarsNewsê ya Îranê ew xwendekar hatiye desteserkirin û “rastî ti şkence û lêdanê” nehatiye.

Şaxa Rêxistina Efûyê ya Navneteweyî ya Îranê (Amnesty Iran) jî li ser bûyerê daxuyaniyek belav kir.

Amnesty Iranê diyar kir ku bûyerê doh êvarî rû daye û wê xwendekarê ji bo şermezarkirina hîcabê ew xwenîşandan kiriye.

Amnesty Iranê tekez jî kir ku di pêvajoya binçavkirinê de îdiayên lêdan û şîdeta zayendî hene.

Amnesty Iranê bangî berpirsên Îranê kir ku van îdiayan bi awayekî serbixwe û bêalî lêkolîn bike û xwendekar di dema binçavkirinê de ji şkence û miameleya xerab bê parastin û destûr bê dayîn ku bi malbat û parêzerê xwe re hevdîtinê pêk bîne.