Îraq û Tirkiyeyê li hev kir: Qebareya bazirganiyê zêde dikin
Hewlêr (Rûdaw) - Îraq û Tirkiyeyê li hev kir ku qebareya bazirganî û weberhênanên di navbera her du welatan de zêde bikin.
Ofîsa Çapemeniyê ya Wezareta Barzirganiyê ya Îraqê ragihand ku Wezîrê Bazirganiyê yê wî welatî Atir el-Xerîrî û Wezîrê Bazirganiyê yê Tirkiyeyê Omer Bolat li Bexdayê civiyan.
Hat diyarkirin ku Îraq û Tirkiyeyê li hev kir ku hecma bazirganî û weberhênanên di navbera her du welatan de zêde bikin û di vê çarçoveyê de astengiyên ku hene bên rakirin.
Komîsyon tên çalakkirin
Herwiha her du aliyan li hev kir ku komîsyonên hevbeş bên çalakkirin û peymanên ku îmze kirine bên cîbicîkirin.
Atir el-Xerîrî diyar kir ku fermana Serokwezîrê Îraqê Mihemed Şiya Sûdanî ji bo astengiyên li ber pêwendiyên aborî, weberhênan û bazirganiyê yên her du dewletan bên rakirin heye û got:
“Ji bo qebareya bazirganiyê û weberhênanên di navbera Tirkiye û Îraqê de zêde bibe divê şert û merc bên sazkirin.”
“Divê kompanyayên Tirkiyeyê li Îraqê zêdetir cih bigirin”
Atir el-Xerîrî destnîşan kir ku divê kompanyayên Tirkiyeyê li Îraqê di warê pîşesazî, avahîsazî, xizmet û qadên din de cih bigirin û wiha got:
"Li Îraqê gorî kompanyayên dewletên din herî zêde şirketên Tirkiyeyê hene. Ji bo hêsanî çêbe û astengî rabin em ê pir bixebitin."
Li gorî daxuyaniyê, Omer Bolat ragihand ku ew dixwazin têkiliyên di navbera Tirkiye û Îraqê de pêş ve biçin û xurttir bibin bi taybetî jî peywendiyên bazirganiyê.
Bolat: Em razî ne
Bolat jî li ser hesabê xwe yê Xê got:
"Di civîna ku nûnerên me yên karsaz jî hebûn de me razîbûna xwe ya ji pêşketina bazirganiya di navbera Tirkiye û Îraqê de parve kir. Li Îraqê di qada bazirganî, weberhênan û avahîsaziyê de jî welatê pêşeng em in û em ji vê jî razî ne.
Ji bo ku em bazirganiya di navbera xwe de zêdetir bikin, pirsgirêkên ku kompanyayên me lê rast tên çareser bikin û bi sektora taybet re zêdetir têkildar bin, me li hev kir."
Bolat destnîşan kir ku ji bo têkilî û bazirganiya di navbera her du welatan de zêdetir bibe dê ji her du aliyan jî serdan zêdetir bibin.
Bolat duh li Bexdayê bi Alîkarê Serokwezîrê Îraqê û Wezîrê Planê yê Îraqê Mihemed Temîm re hevdîtin kiribû.