Hizbulahê 11 caran êrişî Îsraîlê kir
Hewlêr (Rûdaw) – Hizbulahê ragihand ku wan ji başûrê Libnanê 11 caran êrişî Îsraîlê kiriye.
Li gorî daxuyaniyê, di van êrişan de çeperên leşkerî û cihên sivîlan bûne hedef.
Hizbulahê li ser êrişên xwe yên 24 saetên dawiyê daxuyaniyek da.
Hizbulahê da zanîn ku li bajarokê Hulayê yê li başûrê Libnanê, 3 sivîl di êrişeke Îrsaîlê de hatine kuştin.
Hizbulahê destnîşan kir ku wan ji bo tolhildanê bi dehan mûşekên katyuşayê berdane herêmên Kîryat Şmona û Kifer Blumê yên Îsraîlê.
Îsraîlê jî ragihand ku ji Libnanê 30 mûşek ber bi Kîryat Şmonayê ve hatine berdan û 10 ji wan ji aliyê sîstema parastinê ya asmanî ve hatine xistin.
Piştî ku 7ê Çiriya Pêşîna 2023yan şerê Hemas û Îsraîlê dest pê kir gelek caran Hizbulaha Libnanê û Îsraîl jî êrişî hev dikin.
Di van êrişan 232 endamên Hizbulahê, 48 sivîlên Libnanî; 11 leşkerên Îsraîlê û 6 sivîlên Îsraîlî hatine kuştin.