Êrişî Pêşmergeyan hatibû kirin, Serokatiya Herêma Kurdistanê daxuyanî da
Hewlêr (Rûdaw) - Serokatiya Herêma Kurdistanê, êrişa li hemberî baregeha Pêşmergeyan bi awayekî tund şermezar kir.
Hikûmeta Herêma Kurdistanê ragihandibû ku li navçeya Pîrmamê ya Hewlêrê şeva borî saet 23:45an 2 dronên bombebarkirî êrişî navendeke hêzên Pêşmergeyên Kurdistanê kir.
Hikûmeta Herêma Kurdistanê dabû zanîn ku di vê êrişê de ti ziyanên canî çênebûne.
Serokatiya Herêma Kurdistanê ev êriş şermezar kir û got, “Êrişên bi dronan ên li Herêma Kurdistanê dê tenê xisarê bidin aştî û aramiya Îraqê û dê rewşê aloztir bikin.”
“Em bangî Hikûmeta Îraqê dikin”
Serokatiya Herêma Kurdistanê di daxuyaniya xwe de wiha got:
“Em êrişa terorî ya şeva borî ya ku baregeha Pêşmergeyan kir hedef bi tundî şermezar dikin.
Êrişên li hemberî Pêşmergeyên ku hêzeke fermî ne û parçeyek ji pergala parastina Îraqê ne, aştî û aramiya Îraqê dixin metirsiyê û ev yek nayê qebûlkirin.
Em bangî Hikûmeta Federal a Îraqê dikin ku ji bo êrişkar werin girtin û cezakirin tedbîrên cidî wergire, bi Hikûmeta Herêma Kurdistanê re lepirsînên hevpar bike û pê re hevkariyê bike.
Êrişên bi dronan ên li Herêma Kurdistanê dê tenê xisarê bidin aştî û aramiya Îraqê û dê rewşê aloztir bikin.”