ROJAVA - Ji bo parastina zarokan gavên nû tên avêtin
Hewlêr (Rûdaw) - Desteya Jinê ya Rêveberiya Xweser bi daxuyaniyekê kampanyaya Parastina Mafên Zarokan ragihand.
Di daxuyaniyê de hat diyarkirin ku parastina mafên zarokan erkekî exlaqî û mirovî ye û berpirsiyariya hemû civakê ye.
Kampanyayê bi dirûşma “Saxlemî û parastin, bipêşvebirin û hişyarîkirin ji bo zarokiyeke saxlem” 21ê Tebaxê dest pê kir û dê 19ê Çiriya Paşîn bi dawî bibe.
Cîgira Desteya Jinê ya Rêveberiya Xweser Sewsen El-Xelefê li ser kampanyayê got:
“Bi sedema şer û her wiha bi sedema êrişên Tirkiyeyê yên li ser herêma me gelek malbat li şûna ku bilîzin û di tenduristiyeke baş de bijîn neçar dibin zarokên xwe bişînin ser kar.”
Bernameya kampanyayê hejmarek çalakiyan li xwe digire ku di nav de lidarxistina civîn û semîneran, her wiha festîvaleke taybet a zarokan heye.
“Dê kursên rahênana geşkirina şiyanên zarokan hebin”
Cîgira Desteya Jinê ya Rêveberiya Xweser Sewsen El-Xelef her wiha anî ziman:
“Di nav bernameya kampanyayê de dê lidarxistina civîn û semînerên li ser rola malbat û civakê ya ji bo parastina mafên zarokan, her wiha kargeh û kursên rahênana geşkirina şiyanên zarokan hebin.”
Krîza bêhtir ji 13 salan li Sûriye û Rojavayê Kurdistanê bandoreke neyînî ya mezin li ser zarokan kiriye.
Her wiha gelek zarok êdî ji xwendin û perwerdeyê bê par mane û ketine nav bazara kar û debara jiyanê.