ROJAVA – Êrişî baregeha Amerîkayê hat kirin
Hewlêr (Rûdaw) - Li gundewarê bajarokê Til Koçerê yê Cizîra Rojavayê Kurdistanê, êrişî baregeheke leşkerî ya Amerîkayê hat kirin.
Li gorî çavkaniyên xwecihî, ev êriş şeva borî pêk hatiye û di êrişê de hêzên Amerîkayî û Hêzên Hevpeymaniya Navdewletî hatine armanckirin.
Li aliyê din, baregeha ku hatiye mûşekbarankirin li gundê Xirab El-Cîrê (Til Hecer) yê bajarokê Til Koçerê ye.
Li gorî agahiyan, di êrişê de ti ziyanên canî çênebûne.
Hat ragihandin ku grûpeke ser bi Îranê ve ya bi navê “El-Muqaweme El-Îslamiye”yê ew êriş li xwe girt.
Di 6 rojan de 7 êriş
Demên dawiyê gelek caran êrişî baregehên Amerîka û Hevpeymaniya Navdewletî yên li Îraq û Sûriyeyê tê kirin.
24ê vê mehê jî baregeha Amerîkayê ya li bajarokê Şedadê yê Hesekê ji aliyê grûpên ser bi Îranê ve hat armancgirtin û teqandin.
Li gorî zanyariyên Rewangeha Sûriyeyê ya Mafên Mirovan (SOHR), grûpên ser bi Îranê ve, di 6 rojên borî de 7 caran êrişî baregehên Amerîkayê yên li Sûriye û Rojavayê Kurdistanê kiriye.