Yekem car e rayedareke pilebilind a NYyê serdana Rojavayê Kurdistanê kir
Hewlêr (Rûdaw) - Rêveberiya Xweser ragihand ku Raportora Taybet a Neteweyên Yekbûyî Fionnuala Ni Aolainê serdana Rojavayê Kurdistanê kir.
Raportora Taybet a Mafên Mirovan û Dijî Terorê ya Neteweyên Yekbûyî Fionnuala Ni Aolainê serdana Rojavayê Kurdistanê kir.
Rêveberiya Xweser, li ser serdana Raportora Taybet a Neteweyên Yekbûyî Fionnuala Ni Aolain û şanda pê re daxuyaniyek belav kir.
Di daxuyaniye de hat ragihandin ku şanda Neteweyên Yekbûyî bi hevserokatiya Daîreya Têkiliyên Derve Bedran Çiya Kurd û Semer El Ebdullah, endamê Desteya Rêveber Xalid Îbrahîm re civiyaye.
Rêveberiya Xweser bal kişand ser wê yekê ku ev cara yekem e ku berpirseke pilebilind a Neteweyln Yekbûyî serdana Bakur û Rojhilatê Sûriyê dike û serdanê ji 16 heta 19ê Tîrmehê berdewam kir.
Li gorî daxuyaniyê rewşa niştecihên kampên Hol û Rojê û vegerandina biyaniyên di kampan de hatiye niqaşkirin.
Herwiha Rêveberiya Xweser da zanîn ku şanda Neteweyên Yekbûyî di nava du rojan de serdana hemû navendên girtinê, navendên sererastkirinê û kampên li rojavayê Kurdistanê kiriye.
Rêveberiya Xweser tekez kir ku ev serdan gelekî girîng e ji bo bang li civaka navneteweyî bike ku erka xwe li hember rewşên navendên girtinê û kampan pêk bîne.
Li aliyê din Rêveberiya Xweser diyar kir ku ew nikarin bi tenê vî barî rake û bang li civata navneteweyî ku hevkar be û çareseriyeke giştî ji pirsgirêka bi hezaran malbatên li kampan dimînin re ku ji zêdetirî 60 welatî ne, peyda bike.
"Pir girîng e ku bernameyên perwerdehiyê werin pêşxistin"
Rêveberiya Xweser di daxuyaniyê de got:
“Ji bo mafên mexdûran û pêkanîna dadmendiya civakî û navneteweyî, terorîstên biyanî yên ku li van navendan hatine ragirtin û barê ewlekarî û lojîstîkî ji Rêveberiya Xweser re çêdikin, bên darizandin. Ji bo zarokên ku di nav şert û mercên zehmet de mezin dibin, pir girîng e ku bernameyên perwerdehiyê werin pêşxistin"
Li gorî ku di dawiya daxuyaniyê de hatiye, Rêveberiya Xweser ji serdana şandê bi hêvî ye ku deng û bangên wan bighîne civaka navneteweyî da ku erka xwe li hemberî vê dosyayê pêk bîne.