Li Hesekê şer û pevçûn rawestiyan!
Hewlêr (Rûdaw) – Li Hesekê şer û pevçûnên di navbera hêzên Hikûmeta Sûriyeyê û çekdarên Parastina Niştimanî de rawestiyan.
Li Çargoşeya Ewlehiyê ya bajarê Hesekê, di navbera hêzên Hikûmeta Sûriyeyê û çekdarên Parastina Niştimanî ya bi fermandariya Ebdulqadir Hemo de şer û pevçûnên dijwar hebûn.
Çavkaniyeke taybet a ji bajarê Hesekê ji Tora Medyayî ya Rûdawê re ragihand ku ji îro serê şeveqê ve şer û pevçûn rawestiyane.
Heman çavkaniyê da zanîn ku dengên teqînan êdî nayên bihîstin.
Li gorî heman çavkaniyê, heta niha çarenivîsa Ebdulqadir Hemo nehatiye eşkerekirin.
Jinek miriye, 6 sivîl birîndar bûne
Li gorî çavkaniyên bijîşkî yên Hikûmeta Sûriyeyê, ji ber şer û pevçûnên li Hesekê, jinekê jiyana xwe ji dest daye û 6 sivîl jî birîndar bûne.
Li gorî çavkaniyên xwecihî, di şer de efserek û 2 serbazên Hikûmeta Sûriyeyê hatine kuştin.
Şer û pevçûnên li Çargoşeya Ewlehiyê ya bajarê Hesekê yên di navbera Artêşa Sûriyeyê û milîsên Parastina Niştimanî de ji roja çarşemê berê sibehê ve berdewam dikirin.