Blinken: Herêma Kurdistanê şirîkê nêzîk ê Amerîkayê ye
Hewlêr (Rûdaw) - Wezîrê Karên Derve yê Amerîkayê Antony Blinken got, “Hikûmeta Herêma Kurdistanê şirîkekî nêzîk e û Amerîka eşkere êrişên Îranê şermezar dike.”
Serokwezîrê Herêma Kurdistanê Mesrûr Barzanî li Davosê bi Wezîrê Karên Derve yê Amerîkayê Antony Blinken re civiya.
Piştî hevdîtinê Wezîrê Karên Derve yê Amerîkayê Antony Blinken wêneyê hevdîtina xwe ya bi Serokwezîr Mesrûr Barzanî re li ser tora civakî parve kir û dupat kir ku ew êrişên Îranê yên li Hewlêrê şermezar dikin.
Wezîrê Karên Derve yê Amerîkayê Antony Blinken di peyama xwe de got:
“Piştî êrişa Îranê ya doh a li Herêma Kurdistanê, îro li Davosê me bi Serokwezîr Mesrûr Barzanî re hevdîtinek kir.
Hikûmeta Herêma Kurdistanê şirîkekî nêzîk e û Amerîka bi eşkere êrişên Îranê şermezar dike.”
Ofîsa Serokwezîrtiyê doh derbarê hevdîtina Mesrûr Barzanî û Antony Blinken daxuyaniyek belav kir.
Di daxuyaniyê hat gotin, Blinken diyar kir ku Amerîka û Serokê Amerîkayê Joe Biden êrişên li Herêma Kurdistanê wekî metirsiyeke cidî dibînin û ji bo ewlehî û îstiqrara herêmê dê hewlên pêwîst bidin.
Spoke with Prime Minister @masrourbarzani today in Davos following Iran’s attack on the Iraq Kurdistan Region yesterday. The Kurdistan Regional Government is a close partner, and the United States unequivocally condemns Iran’s aggression. pic.twitter.com/MadaRHhGVg
— Secretary Antony Blinken (@SecBlinken) January 17, 2024
Çi bûbû?
Supaya Pasdaran a Îranê, şeva 15ê Kanûna Paşîn êrişî Hewlêra paytexta Herêma Kurdistanê kir.
Di vê êrişa Îranê de 4 sivîlan canê xwe ji dest da û 16 kes jî birîndar bûn.
Îranê derdora demjimêr 23:30î bi 11 mûşekan êrişî Hewlêrê kir û pênc ji wan li mala sermayedarê Hewlêrê Pêşrew Dizeyî ketin.
Pêşrew Dizeyî, keça wî Jîne, mêvanê wî û xizmetkareke mala wî cane xwe ji dest da.
Li mala Dizeyî amadehî dihatin kirin ku piştî 10 rojan rojbûna ewil a Jîneyê were pîrozkirin lê wê ji ber êrişên Îranê saleke tenemê xwe jî temam nekir.
Hevjîna Dizeyî û du kurên wî jî di heman êrişê de li mala xwe birîndar bûn. Rewşa tenduristiyê ya kurekî wî xerab e û niha li Îmarata Erebiyê tê tedawîkirin.
Li aliyên din, Dijeterora Kurdistanê jî heman rojê ragihand, 3 dronên bombebarkirî yên ku armanca wan Balafirgeha Navneteweyî ya Hewlêrê bû, xatine xistin.
Berpirsê Operasyonên Taybet ê Ajansa Parastin û Îstixbaratê Ebdula Hemereşîd ji Tora Medyayî ya Rûdawê re da zanîn ku wan bi rêya sîstema parastina esmanî du mûşekên Îranê xistine xwarê.
Sibeha 16ê Kanûna Paşîn demjimêr 05:50î jî dîsa li nêzîkî Balafirgeha Hewlêrê dronek ketibû xwarê û teqiyabû.
Nûçegihanê Rûdawê Sîdar Leşkirî da zanîn ku ew dron a grûpa bi nave Berxwedana Îslamî ya Îraqê bûye.
Ev êrişên Îranê hem li nav Kurdan hem jî li qada navneteweyî bûn sedema gelek bertekan.
Welatên wekî Amerîka, Çîn, Fransa, Almanya, Tirkiye û Fînlendayê ev êriş şermezar kirin.
Dîsa gelek partî, sazî û rêxistinan Kurdan jî bertekên tund nîşanî van êrişên Îranê dan û wan Îran şermezar kir.