Nadiya Murad daxwaz ji Tirkiyê kir êrîşên ser Şingalê rawestîne
Hewlêr (Rûdaw) – Keça Kurda Êzidî, Nadiya Murad ku wergira Xelata Nobel a Aştiyê û Balyoza Niyetpakiyê ya Netewên Yekgirtî ye, daxwaz ji Wezîrê Derve yê Tirkiyê Mevlut Çavuşoglu kir, ku artêşa Tirkiyê bombebaranên ser Şingalê rawestîne.
Nadiya Murad ku ji bo beşdarîkirin di Korbenda Duha de li Qeterê ye, li ser hesaba xwe ya twîterê ragihandiye, li gel Wezîrê Derve yê Tirkiyê Mevlut Çavuşoglu re civiyaye û di vê civînê de behsa bombebarana herî dawî ya Tirkiyê bo ser Şingalê kiriye.
Nadiya Murad di peyama xwe de dibêje, wê di vê civînê de daxwaz ji Çavuşoglu kiriye ku bombebaranên li ser Şingalê rawestîne.
Met w/minister @MevlutCavusoglu to dicuss the recent Turkish airstrikes in Sinjar. Turkey & Iraq must work together to find a solution to prevent any further bombings in Sinjar. We want to rebuild what ISIS destroyed & help Yazidis return home. pic.twitter.com/1aTmlNMhLE
— Nadia Murad (@NadiaMuradBasee) December 16, 2018
Nadiya Murad dibêje: “Pêwîst e Tirkiye û Iraq pêkve kar bikin bo dîtina çareseriyekê ji bo rêgirtina ji bombebaranên ser Şingalê”.
Keça Kurda Êzidî û xwediya Xelata Nobel a Aştiyê ya 2018ê, bêyî ku amaje bi bersiva Wezîrê Derve yê Tirkiyê li ser vê daxwaza xwe bike, destnîşan kiriye, ku ew “dixwazin navçeyên wêranbûyî yên ku DAIŞê wêran kirine, avedan bikin, herwiha alîkariya Kurdên Êzidî bikin, ji bo ku vegerin ser warê xwe”.
Di derbarê hevdîtina li gel Nadiya Murad de, Wezîrê Derve yê Tirkiyê jî li ser twîtera xwe ragihandiye, ku ew li gel Nadiya Murad civiyaye û” behsa rewşa Êzidiyan kirine”.
Discussed w/ #Yezidi activist and 2018 #Nobel Peace Prize winner @NadiaMuradBasee the situation of Yezidis. PKK/PYD/YPG continues to oppress everyone in Iraq & Syria, including Yezidis, Assyrians and Kurds. pic.twitter.com/ZZlpWjH6kL
— Mevlüt Çavuşoğlu (@MevlutCavusoglu) December 16, 2018
Mevlut Çavuşoglu herwiha gotiye: “PKK, PYD û YPG berdewam e li ser serkotkariya her kesî li Iraqê û Sûriyê, û ji wan jî Êzidî, Aşûrî û Kurd”.