Bajar bi bajar nifûsa Bakurê Kurdistanê çi qas e?

Hewlêr (Rûdaw) - Saziya Amaran a Tirkiyeyê (TUIK) ragihand ku nifûsa Tirkiye û Bakurê Kurdistanê 85 milyon û 372 hezar û 377 e.

Bajarê herî mezin ê Tirkiyeyê Stenbol û yê Bakurê Kurdistanê jî Riha ye.

TUIKê amarên nifûsa Tirkiye û Bakurê Kurdistanê yên sala 2023yan eşkere kirin.

Li gorî amarên TUIKê, nifûsa 25 parêzgehên Bakurê Kurdistanê 17 milyon û 160 hezar û 136 e û nifûsa tevahiya Tirkiyeyê jî 85 milyon û 372 hezar û 377 e.

Nifûsa Bakurê Kurdistanê sala 2022yan 17 milyon û 117 hezar û 48 kes bû û ya Tirkiyeyê jî 85 milyon û 279 hezar û 553 kes bû.

Nifûsa Tirkiye û Bakurê Kurdistanê li gorî sala 2022an gelekî kêm zêde bûye.

Nifûsa Bakurê Kurdistanê sala 2023yan li gorî sala 2022yan tenê 48 hezar û 88 kes zêde bûye.

Li Tirkiyeyê, Stenbol bi 15 milyon û 655 hezar û 924 kesan di rêza yekem, Enqere bi 5 milyon û 803 hezar û 482 kesan di rêza duyem û Îzmîr bi 4 milyon û 479 hezar û 525 kesan di rêza sêyem de cih digirin.

Li Bakurê Kurdistanê nifûsa herî zêde li Rihayê ye

Di nav 25 parêzgehên Bakurê Kurdistanê de Riha bi 2 milyon û 213 hezar û 964 kesan di rêza yekem de ye.

Dîlok bi 2 milyon û 164 hezar û 134 kesan di rêza duyem de ye û Amed bi milyonek û 818 hezar û 133 kesan di rêza sêyem de ye.

Parêzgeha Dêrsimê jî bi 89 hezar û 317 kesan bajarê herî biçûk ê Bakurê Kurdistanê ye.

Li bajarên erdhejê nifûs kêm bûye

Li parêzgehên Semsûr, Mereş û Meletiyê ku erdhejên 6ê Sibatê bandoreke zêde li wan kir, ji ber kesên canê xwe ji dest daye û koç kiriye nifûs kêm bûye.

Li Semsûrê nifûs ji 635 hezar û 169 kesan daketiye 604 hezar û 978 kesan, wate bi qasî 30 hezar û 191 kesan kêm bûye.

Li Mereşê nifûs ji milyonek û 177 hezar û 436 kesan daketiye milyonek û 116 hezar û 618 kesan, ango 60 hezar û 818 kes kêm bûne.

Li Meletiyê nifûs ji 812 hezar û 580 kesan daketiye 742 hezar û 725 kesan, ango 69 hezar û 855 kes kêm bûne.

Hejmara Nişteciyên Parêzgehên Bakurê Kurdistanê:

               2022                     2023

Riha:        2,170,110           2,213,964

Dîlok:       2,154,051          2,164,134

Amed:    1,804,880          1,818,133

Wan:       1,128,749          1,127,612

Mereş:   1,177,436           1,116,618

Mêrdîn:   870,374             888,874

Erzirom:  749,754            749,993

Meletî:   812,580              742,725

Sêwaz:    634,924             650,401

Êlih:          634,491              647,205

Semsûr:   635,169             604,978

Xarpêt:   591,497               604,411

Şirnex:   557,605                570,745

Agirî:    510,626                511,238

Mûş:      399,202                399,879

Bedlis:   353,988                359,747

Sêrt:        331,311              347,412

Colemêrg  275,333           287,625

Çewlîg:   282,556               285,655

Qers:       274,829              278,335

Erzingan  239,223             243,399

Îdir:          203,594              209,738

Kilîs:         147,919              155,179

Erdexan   92,481                92,819

Dêrsim:   84,366                89,317

Giştî:    17,117,048          17,160,136