Şêxmûs Sefer: Sedema êrişan bêxwedîbûn û bêdewletbûn e

RÛDAW

Hewlêr (Rûdaw) - Civaknas û nivîskar Şêxmûs Sefer amaje bi êrişên li ser Kurdan kir û got, “Em Kurd nikarin bi ruhekî netewî tevbigerin” û tekez kir, “Sedema êrişan bêxwedîbûn û bêdewletbûn e.”

Êrişên li ser karkerên Kurd li bajarên Tirkiyê zêde bûne û herî dawî li bajarê Sakaryayê hejmareke karkerên Kurd ku piraniya wan jin û zarok in, rastî êrişeke nijadperest hatin û ew karker neçar man vegerin gundê xwe li Mêrdînê.

Civaknas û nivîskar Şêxmûs Sefer beşdarî bultena Rûdawê bû û behsa sedema êrişên li ser karkerên Kurd kir.

Şêxmûs Sefer dibêje, heta niha bûyerên bi vî rengî li gelek bajarên Tirkiyê çê bûne û sedema wan jî vedigerîne ser “bêxwedîbûn û bêdewletbûna” Kurdan.

Ew civaknasê Kurd helwesta Kurdan a li hember xelkê ku ji derve tên bajarên Bakurê Kurdistanê li gel miameleya li hember Kurdan a li bajarên Tirkiyê berawird dike û dibêje, “Dema Tirkek tê welatê me em mala xwe ya herî xweş li ber vedikin, em li ser serê xwe datînin.”

Şêxmûs Sefer dibêje, li hember van bûyeran “em nikarin wek netewe tevbigerin. Ew milet dijmintiya Kurdan dike. Ev bi hezar nimûneyan hatiye selmandin. Eger mumkun be dê tiştên xerabtir bînin serê Kurdan.”

Ew lêkolînerê Kurd amaje bi wê jî dike ku siyaseta Tirkiyê ji roja ku ava bûye heta niha li ser “kuştin, bişaftin, talankirina Kurdan” hatiye meşandin “lê bi ser neketin.”

Şêxmûs Sefer balkişand ser avabûna Partiya Demokratîk a Gelan (HDP) û siyaseta “Tirkiyebûnê” û got, “Ev proje her ku diçû bi ser ket. Êdî tiştên neasayî ji me re asayî xuya dikin. Em êdî li însanên xwe xwedî dernakevin. Siyaseta Kurdan Kurd li Bakurê Kurdistanê kedîkirin. Êdî ti helwestek çê nabe.”

Herwiha Şêxmûs Sefer diyar dike ku ew malbatên Kurd ji ber hejariyê ji neçarî berê xwe didin bajarên Tirkiyê û dibêje, eger li bajarên Bakurê Kurdistanê şert û merc guncaw bin Kurd ji bo dabînkirina debara jiyana xwe berê xwe nadin bajarên Tirkiyê.

Li hember van êrişan jî Şêxmûs Sefer dibêje, divê Kurd li ser lingên xwe bisekinin, hilberîna xwe baştir bikin û bikarin di nav civaka xwe de bijîn.