Ozgur Ozel: Ahmet Turk ev 50 sal in îradeya gelê Mêrdînê ye
Hewlêr (Rûdaw) - Serokê CHPyê Ozgur Ozel ragihand ku ev 50 sal in Ahmet Turk îradeya gelê Mêrdînê ye û nabe qeyûm li ser îradeya xelkê Mêrdînê were danîn.
Wezareta Karên Navxwe ya Tirkiyeyê îro qeyûm danîn ser şaredariyên parêzgehên Mêrdîn û Êlihê û navçeya Xelfetiyê ya Rihayê.
Serokê Giştî yê Partiya Komarî ya Gel (CHP) Ozgur Ozel tevî şandeyekê ji bo piştgiriya Hevserokên Şaredariya Bajarê Mezin a Mêrdînê Ahmet Turk û Devrîm Demîrê çû Mêrdînê.
“Ev çi aqilê dewletê ye?”
Ozgur Ozel tevî şandeyeke CHPyê li pêş Şaredariya Bajarê Mezin a Mêrdînê axivî û wiha got:
“Ez sala 1974an de hatim dinyayê, dema ez hatim dinyayê Ahmet Turk parlamenterê CHPyê bû.
Di wê serdema ku Recep Tayyîp Erdogan serokê rêxistina bajêr a partiya xwe bû û dixwest bibe şaredarê Beyogluyê, Ahmet Turk 2 serdeman ji SHPyê parlementerî kiribû.
Em dewra 23 û 24an a parlamentoyê, bi hev re bûn. Ev 50 sal in xelkê Mêrdînê û Kurd her cara ku sindoq tê danîn Ahmet Turk hildibijêre.
Em ji bo silavkirina vîna we li dijî wan kesan dijberiya vîna Mêrdînê ne hatin vir.
Di heyama yekem de li cihê Ahmet Turk qeyûm tayîn kirin Ahmet Turk dengê dengê ji sedî 50yê Mêrdiniyan stand.
Cara duyem tayînkirin Ahmet Turk ji sedî 56ê dengan bi dest xist lê wan careke din ew ji kar derxist.
Cara sêyem Ahmet Turk ji sedî 58ê dengan stand. Ey Receb Tayyîp Erdogan, ey aqilê xerab ê ku îradeya Tirkiyeyê asteng dike.
Heger tu ji vê re dibêjî aqilê dewletê ev çawa aqilê dewletê ye.
Li bajarê min Manîsayê nêzîkî 100 sal in xelkê Manîsayê kê hilbijêre ew dibe şaredar.
Li Mêrdînê xelkê Mêrdînê namzedên hildibijêrê Ahmet Turk hildibijêrê lê hûn dixwazin qeyûm tayîn bikin.
Ji ber vê yekê, ma ev hemwelatîbûna wekhev e? Li Komara Tirkiyeyê heta ku her Kurdek wekî xelkê Manîsa, Rîze û Osmaniyeyê xwe hîs bike, em dê ji bo demokrasiyê têbikoşin.
Ji ber vê yekê ez hatim vir û bibêjim wekhevî, biratî û aştî.”
“Ahmet Turk kevoka aştiyê ye”
Ozgur Ozel di berdewamiya axaftina xwe de behsa serpêhatiya siyasî ya Ahmet Turk jî kir û got:
“Binêr e Ahmet Turk, ev kesê ku beriya ji dayikbûna min di nava siyasetê de bû, ew kevoka aştiyê ye ku di siyasetê de diyalog, aştî û biratiyê temsîl dike, li şûna pevçûnan aştiyê diparêze û ji me hemûyan re pêşengiyê dike.
Hûn li ku derê qeyûm tayîn bikin jî ew xelet e. Tayînkirina qeyûman li Esenyurtê jî xelet e, li Êlihê jî Xelet e li Colemêrgê jî xelet e û li vir jî xelet e û li Xalfetiyê jî xelet e.
Hey mirovê Xwedê, tu dibêjî ‘aqilê dewletê û aqilê dewletê’ heger tu qeyûm tayînî her devera Tirkiyeyê bikî û mafê te yê vî jî hebe jî di eslê xwe de de mafekî wisa nîne dema ku mesele Ahmet Turk be tu dê rawest e.
Ahmet Turk ne ew şaredar e ku qeyûm li şûna wî were tayinkirin.
Xelkê Mêrdînê dengê xwe daye Serok Devrîmê heger hûn li dijî vê îradeyê derkevin, tê wê wateyê ku we dîrok û biratiya Mêrdînê fêm nekiriye.
Mêrdînê di hilbijartinê de gotina xwe got û hûn jî îradeya Mêrdînê bêdeng nekin. Ez hatim biaxivim.
Ji ber ku em gotinê diparêzin, di demokrasiyên de gotin bi qîmet e.
Ez bang li hemû aktorên siyaseta Tirkiyeyê dikim dev ji van xeletiyan berdin, bi paş de gav biavêjin û dest dirêjî îradeya xelkê nekin. “
Ozgur Ozel di berdewamiya axaftina xwe de amaje bi wê yekê kir ku dê sibe Meclisa Yekîtiya Şarederiyên Tirkiyeyê (TBB) bi serokatiya Ekrem Îmamoglu bicive.
Li gorî gotina Ozgur Ozel dê TBB ji bo rawestandina tayînkirina qeyûman ji bilî Serokkkomarê Tirkiyeyê Recep Tayyîp Erdogan dê ji siyasetmedaran randevuyê bixwaze.