Endamê Rêxistina Asûrî ya Demokrat hat berdan

Hewlêr (Rûdaw) - Endamê Rêxistina Asûrî ya Demokrat Husam El-Qes ku duh li bajarê Dêrîka Rojavayê Kurdistanê hatibû girtin, îro hat berdan. El Qes dibêje ku, li ser çend postên li torên civakî ew hat girtin.

Li bajarê Dêrîka Rojavayê Kurdistanê duh endamê Ofîsa Ragihandina Bereya Aştî û Azadiyê û endamê Rêxistina Asûrî ya Demokrat Husam El-Qes, ji aliyê hin kesên ne nas ve hatibû girtin.

Desteya Seroketiya Bereya Aştî û Azadiyê, di daxuyaniyeke fermî de ragihand, ku îro Husam El-Qes li bajarê Dêrikê hatiye berdan û niha li gel malbata xwe ye.

Husam El-Qes beşdarî bultena Rojava bû û li ser girtina xwe ragihand, hêzên ser bi Rêveberiya Xweser ve ew girtin.

Li ser sedema girtinê jî El-Qes diyar kir, ji ber hinek postên li ser torên civakî biryara girtinê derbarê wî de hatibû dayîn û got, "Rêveberiya Xweser rexneyên min qebûl nekirin."

Desteya Seroketiya Bereya Aştî û Azadiyê duh di daxuyaniyeke fermî de ragihandibû, ku roja Pêncşemê, Husam El-Qes dixwast ji bajarê Dêrîkê vegere mala xwe, lê hejmarek kesên rûgirtî, êrîşî wî kirine, li wî xistine û pişt re ew revandine.

Bereya Aştî û azadiyê di daxuyaniya xwe de dibêje, girtin û revandin berovajî yasayê ye û ew Rêveberiya Xweser di ber girtina Endamê xwe de berpirs dibînin, ji ber ku ew li navçeyê xwedî desthilat in. Duh

Ofîsa Cîbicîkar ya Rêkxistina Aşûrî jî di daxuyaniyekê de girtin û revandina Husam el-Qes şermezar kiribû û daxwaza azadkirina wî kiribû.

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger