Tirkiyê bi dron êrişî Dirbêsiyê kir: 4 kes birîndar bûn

Hewlêr (Rûdaw) – Artêşa Tirkiyê îro bi dronan êrişî bajarê Dirbêsiyê yê Rojavayê Kurdistanê kir. Di êrişê de wesayitek hat armanckirin û 4 kes birîndar bûne.

Îro danê sibê droneke Tirkiyê li ser rêya Amûdê-Dirbêsiyê wesayitek kire armanc.

Li gor agahiyên li nêzîk gundê Xerza yê li rojhilatê bajarê Dirbêsiyê otomobîlek kir armanc.

Di encama bombebaranê de 4 kes (sê jin û ajokarek) birîndar bûne û bo Nexweşxaneya Gel a Amûdê hatine veguhestin.

Dr. Zeyn El-Abidîn Mistefa pizîşkê li Nexweşxaneya Gel a Amûdê ji Rûdawê re ragihand, piştî dermankirina destpêkê li nexweşxaneya wan, birîndar bo Nexweşxaneya Şehîd Xebat a bajarê Qamişlo hatin veguhestin.

 Dr. Zeyn El-Abidîn Mistefa herwiha diyar kir, rewşa 3 ji birîndaran baş e, lê ya birîndareke jin giran e.

Artêşa Tirkiyê herwiha îro gundê Citlê yê li rojavayê bajarê Dirbêsiyê jî bi çekên giran topbaran kir.