Çapa taybet a “Avesta Nivîsên Olî yên Ariyan ên Herî Kevnar” derket

09-09-2021

Hewlêr (Rûdaw) - Çapa taybet a “Avesta Nivîsên Olî yên Ariyan ên Herî Kevnar” ku Celîl Dustxah wek du cild bi Farsî amade kiribû û yek ji edisyonên baş tê zanîn, bi wergera Tahir Agûr bi Kurdî derket.

Weşanên Avestayê çapa taybet a pirtûka “Avesta Nivîsên Olî yên Ariyan ên Herî Kevnar” ku ji 552 rûpel pêk tê bi rengên sor, gewr û qehweyî weşand.

Avesta, pirtûka Zerdeşt û komberhema herî kevnar a gelê arî ya olî ye, ku li gor hin çavkaniyan di destpêkê de ji bîst û yek neskan (beşan) pêk hatiye ku bi derbasbûna demê re û ji ber sedemên cuda, gelek beşên wê winda bûne û niha tenê ji şeş beşên bi navên Gehan, Yesne, Yeşt, Vendîdad, Vîspired û Kurte Avestayê pêk tê ku ji her yekê re defterek tê gotin çap kir.

Peyva “Avesta”yê ku di berhemê bi xwe de derbas nebûye, ji pêşgira navdêrsaz a “A” û lêkera “Vîste” bi wateya naskirin, zanîn, peydakirin û peydabûnê (ku li gel peyva “Veda” (Vîd) pirtûka hindiyan a olî hevreh e) pêk tê. Bi giştî “Avesta” weke “agahîname” yan "zanînname" tê zanîn.

Girîngiya Avestayê ji bo gelên arî û bi taybet kurdan ev e ku gelek bawerî, mîtolojî û çanda bav û kalên wan ên bi hezaran salan berî niha radixe ber çavan. Xebatên ku berî vê berhemê bi Farsî û Kurdî hatine kirin belawela ne û hemû beşên Avestayê bi hev re nehatine çapkirin, lê di vê xebatê de hemû beş (şeş defter) bi hev re hatine û herwiha di beşa pêşgotinê de bi awayekî berfireh û birêkûpêk agahiyên baş der heqê Avesta, Zerdeşt, taybetmendî û mijarên beşan û hwd. hatine dayîn ku çarçoveyeke baş derbarê mezdaperestiyê di mêjiyê lêkolîner û xwendevanan de çêdike.

Dîsa di dawiya berhemê de ferhengek di derbarê peyv û biwêjên Avestayê de hatiye nivîsandin.