Hong Kongî xwaringeh û kafeyên Çînî boykot dikin
Hewlêr (Rûdaw) - Li Hong Kongê tevî berdewambûna xwepêşandanên li dijî yasaya radestkirina tohmetbaran ji bo Çînê, niha xelkê wî welatî boykota xwaringeh û dikanên Çînî dikin.
Li bazarên Hong Kongê, xelkê herêmê, li dijî destwerdana Çînê di karûbarên navxwe yên herêma xwe de, xwaringeh û dikanên Çînî boykot kirine. Dikanên Çîn û Hong Kongiyan bi rêya reng tên naskirin.
Derbarê vê yekê de dikandar Benton Cheung dibêje: “Dema diçin derve bo firavînê diçin derve, yan jî herwiha diçin derve bo xwarineke asayî ligel hevalên xwe, wek piraniya xelkê, wek piraniya me, tên vê derê, temaşe dikin bizanin, rengê xwaringehan zer e yan şîn, wê demê wan dinasin û bo me derdikeve ka piştîvaniya kîjan dikan an xweringehan bikin.”
Rengê zer, wate piştîvanê xwepêşanderan e. Hong Kongî di wê baweriyê de ne ku bi vê rêyê dikarin hevkariya xwepêşanderan bikin, herwiha rê jî nade pereyên wan ji herêma wan derkevin derve.
Jimêryar Nakata Law jî got: “Bi hizra xelkê, eger bazinê me yê aboriya Hong Kongê nebe, wê demê nikarin piştîvaniyê li berdewambûna xwepêşandanan bikin.”
Vê biryara Hong Kongiyan a boykotkirina wan xwaringeh û kafeyên ku piştgiriya xwepêşandanan nakin, an jî Çînî ne bandoreke zêde li bazarê kiriye. Hinek ji xwediyên dikan an kafeyan vê biryarê nedadperwerî binav dikin.
Derbarê mijarê de xwediyê kafeyê Martin Khan jî wiha axivî: “Bi rastî ne dadperwerî ye, bêyî ti hincetekê, tenê li ser bingehê rengan difikirin, bi rastî vê bandor li karê bazirganî kiriye, ev jî bo niha hevkariya Hong Kongê nake.”
Ev biryara Hong Kongiyan a boykotkirina xwaringeh û dikanên Çînî di demekê de ye ku ji meha Hezîrana îsal ve li Hong Kongê xwepêşandan dijî yasaya radestkirina tohmetbaran bo Çînê destpê kiriye û heta niha berdewam in, herwiha daxwazên xwepêşanderan jî zêdetir bûne.